2008年4月27日 星期日

醫管局亂到九彩周一鑊渾渾噩噩


社論及專欄
A06 3 . 太陽報

2008-04-27

食物及生局局長周一嶽真係犯眾怒,除每隔一兩日要上接受太一叮狂叮鎯鎯之外,嘿,原來好多市民都忍無可忍,好想叮埋一份。有民間組織數醫管局七宗罪,連叮佢七,真係大快人心!

其實醫管局點止得七宗罪咁少,佢衰,真係數三日三夜都數唔完,太一叮隨口都可以數多佢七宗罪呀!

只要唔好彩入過公立醫院病人都知,佢地前線醫護人員少得出奇,一個人要睇無數咁多病人不特止,最離奇係,朝早八點見到個醫護人員,晏又係佢幫你派藥,到凌晨三點,都係同一個醫護人員叫醒你幫你量血壓,佢個樣隨時仲殘過病人,你話有乜法子唔做到瘟瘟沌沌,周升有醫療失誤呢!醫管局簡直係收買人命,罪大惡極,抵叮!

查實睇數據就知點解,醫管局高級醫生及副顧問醫生人數,○二至○三年都係得八百幾人,但到○六至○七年,已經有成千人,呢咁高級醫生,咪就係有一大棚人跟住巡房,好威風囉。但至於真係要落手落腳、不眠不休做到嘔實習醫生呢,同一個年期之內唔止冇加到,反而仲減少十幾人,數埋都係得三百幾人,呢咪叫做將多於兵囉,你話市民條命又點會唔凍過水。醫管局罪無可恕,叮!

另一個問題係「護士荒」,醫管局成立之後,懶叻咁要停止登記護士及註冊護士課程。護士資歷學位化唔係唔好,只不過新畢業人數大減,而且佢畢業又唔一定要做護士,就算中大那打素護理學院話會○九年增加多二十個學額,都解決唔到問題。人外國每個護士照顧四至五個病人,香港係一對十四,你話多得二十個學額又幫到乜呢?周一鑊罪加一等,叮!

醫管局呢班低能管理層,搞到成個公共醫療體制亂晒大龍,想搵日冇醫療失誤都幾難,甚至連病人資料咁機密都可以遺失,真係要幾衰有幾衰。之但係有民間團體幫佢計過人工呀,嘩!醫管局行政總裁加埋另外四個聯網總監,年薪要成一千七百萬元,如果以門診成本二百四十蚊一個計,每年可以多七萬幾個門診名額,呢個罪名,你話抵唔抵叮。

仲有呀,醫管局一年花納稅人三百幾億,肥到變成大白象,但係真係用病人身上,就少之又少,好似話準備出年實施長者醫療券計劃,三年總開支五億零五百萬元,但行政費就已經佔成六千八百萬元呀。而今年中落實天水圍北醫管局向私家醫生購買服務計劃都一樣,需要三百萬元行政費,佔總開支五成呀,呢一宗罪,當然更加要叮多佢幾十下啦。

至於話個醫療融資咯喎,講起就把火,小市民供成世,到最後扣埋行政管理費,到時仲有幾多錢剩呀!唔信呀,呢條周一鑊講埋出口啦,香港兒童患流感入院治療數字比美國高出三至十倍,係因為公立醫院收費低呀,為拉低個數字,佢老哥隨時加到住院費貴到嘔都有之。活罪難饒呀周一鑊,叮!

呢條周一鑊周身都係鑊,但又厚面皮賴死唔走,樣衰雖然唔係罪,但無能兼無良就罪無可恕啦,唔叮爆佢鎯鎯唔能夠平民憤呀!

沒有留言: