東方日報@勿當市民提款機 工程超支太敗家(09-01-2014)

富不過三代呢一個講法，究竟係仇富情意結嘅主觀詛咒呢，抑或係有事實根據嘅客觀描述？原來係有客觀事實根據嘅，有人做過統計，自從改革開放以來，三百萬個中國民營企業家之中，由於無法搵到合格嘅接班人，百分之九十五以上擺脫唔到富不過三代嘅宿命。有研究表明，國內富人家族嘅孩子之中，只有約一成嘅子女繼承咗父母嘅優良品質。至於美國，家族企業喺第二代能夠存在嘅只有百分之三十，到第三代仍然存在嘅只有百分之十二。

好嘞好嘞，回歸之後，董建華係第一代，曾蔭權係第二代，梁振英係第三代，特區政府會唔會同樣面對富不過三代嘅問題？功夫茶之所以有呢一層疑慮，原因係最近一次又一次出現工程費用嚴重超支嘅情況，就好比敗家仔窮奢極侈洗腳唔抹腳，庫房儲備再多都會有坐食山崩嘅一日！

第一個敗家仔叫做香港電台，佢哋話要興建新大樓，原本計劃斥資十六億元，點不知事隔四年之後居然急漲至六十億五千多萬，超支接近三倍，比添馬艦新政府總部同立法會大樓加埋仲要高出五億元。超支超得咁鬼死離譜，立法會議員睇唔過眼，工務小組一二三將撥款申請否決咗。

繼香港電台之後，立法會發展事務委員會再否決蓮塘/香園圍口岸項目八十五億五千萬元嘅超支撥款申請。口岸工程費用由前年獲批一百六十二億五千萬元，升至二百四十八億元，短短十八個月之內嚴重超支五成二，你話係咪離譜吖？議員質疑政府估算工程成本出錯，超支理據不足，政府當市民係提款機。

一個超支否決咗，兩個超支否決咗，之但係另一項超支工程通過咗。獲得立法會工務小組開綠燈嘅超支工程係中環及灣仔繞道項目，預算造價由二百八十一億增至超過三百六十億元，超支七十九億。

功夫茶想問問官老爺，庫房可以承受到幾多項超支工程呢？每次超支開口埋口就係大拿拿幾十億，市民作為提款機，可以被撳幾多次呀？

講番港台吖，民間團體107動力日前選出二○一三年十大浪費公帑事件，獲得第一名嘅就係港台向立法會申請撥款六十億元興建新大樓，第二名係終審法院裁定申領綜援須居港七年嘅限制違憲，第三名係西九文化區建築費估計超支一倍。

港台話喎，本月十三日起試播三條電視頻道。計功夫茶話齋，你試播還試播，最緊要嘅係大幅修正新大樓造價，絕對唔容許太敗家嘅浪費公帑，否則遲早成為無底深潭嘅咋！