隔牆有耳：「貪臧華」還錢還公道

專欄專論
A21 5 . 蘋果日報
李八方
2008-05-06

欠債還錢天公地道，偏偏旅發局前總幹事臧明華就死都唔肯嘔番十幾萬醫療保險費出，帳委會譴責佢之後仲一直玩失蹤，呢筆衰貪心糊塗賬簡直係天怒人怨，八方唔封佢做「貪臧華」都唔得。如果佢以為匿得就匿係好方法話，就真係太、太天真，事關有團體已經講明，追到天腳底都要追番筆數，而且唔止15萬蚊咁少，就連90幾萬約滿酬金都應該回水！事關佢任內表現差到痹，點可以仲貼錢送佢走？

唔值約滿酬金

以節儉為宗旨「107動力」噚日踩上旅發局，進行上門收數第一擊，白色帆布噴上「欠債還錢」四個血紅大字，又印成有臧小姐芳容「尋人事」，要求佢見字速還100萬蚊。發起人何民傑表明，今次係代納稅人收數，覺得以臧明華咁表現都有約滿酬金，簡直浪費公帑；聲言臧明華一日唔還錢，一日都會繼續追，追到佢瘦上加瘦為止，唔使旨意逃之夭夭。上周六電台公開呼籲失蹤人口臧明華盡快現身旅發局主席田少，截至噚日都收唔到臧明華回音。敬酒唔飲飲罰酒，既然臧明華當旅發局冇到，田少都唔客氣，先旨聲明話如果一、兩日內冇臧明華消息，理事會會開會跟進，到時就要出動法律程序收拾呢個爛攤子。臧明華係小富婆係人都知，區區十幾萬醫保對佢應該係濕濕碎。今次唔肯回水，除因為唔忿氣，其實都係因為立會要求將事件交畀執法機關調查，一旦臧明華自動獻身還錢，就好似承認真係身有屎，到時執法機關要鋤佢就更有說服力。其實還唔還錢唔係問題，到時咪法庭見囉，八方反而奇怪佢呢種處理手法，唔通以為潛水事件就一了百了？有政界人士估計係律師建議佢唔回應自保喎。

冇再理大露面

八方都試圖四圍搵臧明華現身，但一直未搵到佢。理工大學中人向八方透露，雖然臧明華上個學期已經冇教，但帳委會聆訊期間都不時返office執，報告發表後就冇再露面。有教授更爆料話，連貼office臧小姐玉照最近都被人搣走，相信係唔想再同佢扯上任何關係。