東方日報@貪曾七年多禍患 工程超支不設限(2013-04-22)

貪曾七年，禍港連連，真係唔講得笑。前特首曾蔭權拍拍屁股走人，留低一大堆爛攤子，數佢數簿唔知要數到何年何月何日。民間團體107動力剛剛就完成咗一單數佢數簿嘅調查，再次得出貪曾禍港嘅確鑿證據。

107動力係咁講嘅，貪曾任內八項工程超支總額四百一十三億元，好似手執一張不設限額嘅信用卡，任意提取納稅人嘅血汗錢為工程填氹。工程預算嚴重不準確，好似茶餐廳個餐牌寫住三十元一個常餐，點知埋單竟然要六十元，如果一早知道，香港人可以揀唔入去食，而唔係焗住找數。

簡單咁講，貪曾禍港其中一個弊病係害到納稅人畀多四百一十三億元埋單！

以超支金額最多嘅高鐵香港段鐵路建造工程為例吖，○八年十二月當時嘅曾蔭權政府預算費用係三百五十四億元，短短一年之後工程費用增加至超過五百五十億，超支比率百分之五十五。至於西九文化區戲曲中心，雖然涉及嘅金額唔算十分巨大，只係由十三億元增加至二十七億，之但係如果以比率計算，超支足足一倍有多呀，冇陰功！

因乜事幹貪曾七年會有八項工程超出預算咁亂七八糟？107動力就話嘞，工程批款嘅時候未有詳盡構思，內容空泛，細節欠奉，所以後來就引發嚴重超支。

一方面固然係官僚計錯數，另一方面係問責制形同虛設，喺貪曾親疏有別嘅領導之下，冇人因為工程超支而向公眾道歉甚至引咎落台。喂，曾蔭權捲入一連串貪腐醜聞至今都逍遙法外啦，試問又點會有縮骨官僚願意承擔超支責任呢？由於名不副實嘅問責制毫無阻嚇作用，工程超支咪一次又一次發生囉，大不了歸咎通脹問題。

當然啦，立法會尊貴議員冇做好把關工作都係關鍵之一。八項工程超支四百一十三億元全部獲得財委會開綠燈通過，無論建制派定係民主派都甘願飾演橡皮圖章，一個二個淪為貪曾禍港嘅間接幫兇。

唉，特區政府呢頭浪費超過四百億，嗰頭又對弱勢社群斤斤計較。大家試想想，若然節省公帑將四百億元攞去扶貧，甚至直接派錢救助窮人，香港就唔會有咁多貧富懸殊所造成嘅怨氣啦。又假如，官僚將節省落嚟嘅公帑用於增設老人院宿位，就唔會一年有幾百位公公婆婆等宿位等到死啦。

107動力建議審計署主動調查工程超支問題，要求相關官僚提出解決方法。計功夫茶話齋，公務員表現差而人工高，其實都算係超支，審計署不妨順便查一查，睇下邊個失職官僚有必要減薪受罰！