加！加！加！財政預算案仲未發表，煙民已經感覺到一陣「加風」撲面而來。最搞笑嘅係，港府控煙獨沽一味，控來控去只有加稅一招，結果煙民冇乜少到，反而私煙氾濫成災，你話係咪失敗吖。

呢，早前吸煙與健康委員會建議大幅增加煙草稅一倍，如果落實，預料每包煙要賣到八十幾蚊。據講港府為免加劇民怨，唔敢接納呢項建議，有意將煙草稅緊貼世衞標準，即係每包煙加五至八蚊，話就話冇咁重手，但零售價分分鐘都要賣六十蚊以上，都咪話唔惡頂。之不過咁，煙民未必因為加稅而戒煙，反而可能會走去幫襯私煙，政府隨時因加得減，到頭來盞搞嘅咋。

吸煙危害健康，道理係人都知，所以當局控煙，大多數市民都冇意見。弊在港產官僚關心庫房收入多過關心港人健康，搞到控煙政策自相矛盾，一方面叫人戒煙，另一方面又唔捨得煙稅，簡直就係精神分裂！

講真，加煙稅對於絕大部分市民根本冇影響，最怕當局控煙虛偽，執法甩甩漏漏，宣傳又唔足夠，「吸煙危害健康」變咗講者自講，吸者自吸，有啲禁煙區形同虛設，咁嘅控煙究竟有咩意義，真係令人懷疑。

更弊嘅係，私煙問題愈來愈嚴重，唔單止令控煙措施大打折扣，更嚴重影響庫房收入。舊年有組織調查發現，本港消耗嘅香煙之中，私煙佔咗近三成六，等於每年十八億支，令庫房每年損失三十三億元稅收，話當局因加得減，真係冇講錯㗎。

當局猛加煙稅，話就話要令煙民脫離吸煙行列，其實反而刺激私煙銷量大增，簡直弄巧反拙。正如有立法會議員質疑，本港吸煙人口已經降至極低水平，再加煙稅難令煙民數字減少，反而逼市民購買私煙。嗱，尋日有煙民組織發起遊行，批評當局加煙稅係變相鼓勵煙民轉買私煙，遊行者強調，加稅唔會令年輕煙民減少，過往加稅後，小學生煙民人數反而增加添。

即係咁，雖然前年本港吸煙人口比例創下卅年歷史新低，但唔代表當局控煙措施見成效。事實上，近年女性煙民比例不跌反升，而高小學生吸煙比例亦明顯上升，小四至小六男生吸煙人口比例升幅超過一倍，煙民愈來愈年輕化，問你驚未。

都係古人講得啱，世不患無法，而患無必行之法。計太一叮話齋，當局控煙獨沽一味加稅，而唔識得加強執法，宣傳教育又不足，搞到私煙成行成市，再咁落去，控煙辦不如改名做「私煙辦」吖，笨！