2013年8月7日 星期三

蘋果日報@代理北上「冇外省人咁搏」(07-08-2013)



【專訪】
樓市步入寒冬,有老行尊建議北上避寒覓食。兩年前接任中原集團主席的黎明楷是中原中國的開荒牛,廿年來見盡內地代理業的光怪陸離,對於苦無去處的代理,若果北上,他認為要有心理準備入鄉隨俗。惟他覺得身驕肉貴的港人,唔夠五湖四海的外省人鬥,「深圳有同事收工係瞓公園、瞓沙灘,基本上,屋都無得住,喺香港搵唔到咁嘅同事上去咁搏」,他奉勸本港代理不如捱吓,等港府減辣招。
記者:陳家雄


在內地工作,還要明白人治和法治的分野,黎明楷說:「各種廣告牌要符合當地街道委員會嘅限制,人人唔同標準,話你要點樣改,一係跟佢改、一係用飲茶灌水嘅方法說服佢,在大陸有好多關係工作。有同事問,點解無端白事請食飯?點解買條煙畀佢?唉!總之要啦。」

不過,上述這些都是小問題,作為靠佣金維生的代理,面對內地稅制才是大問題,「各城市各區有自己稅局,面對唔同地方嘅稅局,你要接受一樣嘢,就是,全國不一樣,每一個城市,每個區都是不一樣,你唔好諗住,點解呢個區係咁㗎……其實只是負責人員對稅例有唔同演繹,已經唔講到去收錢嗰樣嘢。」
黎明楷又指出,內地代理行業還有很大發展空間,過去半年,整個中原中國每月二手佣金收入約3億元人民幣,邊際利潤十多個巴仙。儘管內地宏調打壓樓市,卻沒有打死代理行業,反而香港出幾招,代理就死晒,「內地出招是壓價,成交仲喺到,但香港出招是壓需求,搞到無晒成交。」

■中原中國在內地發展,必須要接受各區稅制並不一樣。
勸港代理忍耐等減辣
內地代理有得做,但不代表港人北上有力站得住腳,「香港人無優勢,唔同以往上親去都做管理層,好似94年我派個24歲嘅上去,已經做總經理,但是𠵱家上去,你願意用和香港同一水平嘅崗位入職嗎?」他續稱:「內地好多大城市好多外省人,手停口停,拼搏的鬥心好犀利,深圳有同事收工係瞓公園、瞓沙灘,基本上,屋都無得住,喺香港搵唔到咁嘅同事上去咁搏,而且無升職,工資更與大陸睇齊,更加無人上。」

他奉勸本港的代理:「睇下自己係咪適合做呢行,如果適合,就捱吓。總有一天,政府一定會減辣(招)。」

沒有留言: