東方日報@工商界也拉布(14-06-2013)

立法會審議《2013年印花稅（修訂）條例草案》（草案）就到尾聲，政府本來想七月中會期完結前，盡快低調通過，但工商界就歎慢板，講明會慢慢審議清楚條草案，希望政府諗清諗楚先再闖立法會。有人形容佢打緊「拉布戰」，阻止政府通過草案，但據講實情係工商界只想拖延幾個月時間儲足彈藥，等民間反對聲音逐漸升溫，暑假後復會才向政府開天索價，包括提出修訂或扑低條草案。

黃定光、林健鋒

有關草案審議至今，最大力反對地產及建造界石禮謙已講明提出修訂，要求港人公司可獲豁免。佢黨友商界林健鋒，雖然係行政會議成員，但對草案都好反感，仲幫手游說其他議員支持修訂。聽聞有關修訂連進出口界議員黃定光都傾向支持，而公民黨梁家傑亦話無理由限制香港公司買賣物業。有商界議員就以上面堆籌碼向政府講數，話有關修訂夠晒票通過，如果政府硬闖立法會一定失敗，最好提出讓步或等幾個月後先再提交立法會表決。

點解商界願意等政府幾個月後先至出手？試問世界上邊有咁大隻蛤隨街跳呀，其實商界認為現階段只有機會通過修訂，但終極目標其實想否決成條草案，所以就要儲多幾個月彈藥，有足夠實力先大舉反擊。好多工商界都評估過形勢，發現辣招推出後，最初只得商界呱呱嘈反對，但普羅市民卻拍爛手掌叫好。不過，近日負面影響浮現，樓市成交量極低，交投氣氛一潭死水，搞到三萬幾名地產經紀開始叫苦連天，仲話遲上街抗議。

望至少豁免港人公司

如果過多幾個月，到時唔止地產界，連其他中小企、想換樓業主都會牙痛咁聲，甚至連做開樓宇買賣律師樓，都做少大截生意，屆時班律師就會向好多大狀公民黨施壓。咁對商界來講，拖得愈耐，情況對佢愈有利。工商界呢招可謂一石二鳥，如果政府唔肯拖到下屆會期，為急急通過草案，好大機會都會作出輕微讓步，例如豁免港人公司唔使畀額外印花稅等，咁工商界都叫做有番拿。