東方日報@為轉戰新東直選發功？大輝「過界」撐辣招苦主(09-07-2013)

抗議政府推出連串壓抑樓市辣招「辣招苦主大聯盟」前日舉行遊行，大會話有成二萬三千人參加。參加呢個遊行除一眾地產代理，仲有立法會議員林大輝。不過大輝係工業界議員，照道理就大纜都扯唔埋。之但係大聯盟發言人何民傑係西貢區議員，莫非有意新界東直選大輝已開始發功﹖

林大輝（右二）係前日唯一撐地產代理立法會議員。

自稱受邀參加遊行

「辣招苦主大聯盟」前日舉行遊行，大輝當日認真積極，唔止手持橫額行隊頭，仲行足成個遊行，唔知仲以為佢係地產界議員添。大輝之前都有提過想下屆立法會選舉轉直選，仲有機會出戰新界東。咁何民傑新界東又咁活躍，大輝咁落力難免會令人引起大輝想投桃報李遐想。

我就問過何民傑，佢話佢向七十位立法會議員發出邀請信，邀請佢參加遊行聲援業界，點知得大輝一個回覆話會出席。佢同大輝只係立法會公聽會碰過面，過往完全冇合作過，今次大輝竟然咁畀面行足全程，所以好多謝大輝。

大輝就話，自己係因為受到地產代理邀請先參加遊行，仲話本港一向崇尚自由經濟，政府辣招帶唔少副作用同後遺症，盞打爛香港金漆招牌喎。